【本報記者報道】女歌手李幸倪（Gin Lee）日前受邀飛到匈牙利布達佩斯出騷，演出期間，Gin Lee一連唱了《Dum Dum》、《很堅強》和《今天終於一人回家》，台下反應熱烈。
原來今次是Gin Lee第二次到匈牙利，多年前她亦曾到布達佩斯演出，那次更順道與家人旅行，不過那次的記憶已經很模糊，「我發覺好多細節我都唔記得咗，所以今次我影咗好多相、拍咗好多片，拍咗啲vlog，到時大家就可以睇。同埋我今次一定會記得我去過邊、做過啲乜嘢，唔會好似上次咁有少少模糊。」
由於是第二次到訪，Gin Lee除了表演，更導遊上身帶領未到過匈牙利的同事周圍吃喝玩樂，而且又上網做足功課，去市集購物和看當地美麗的建築。問到在當地有沒有艷遇，她即時落閘：「梗係冇啦！」不過街拍時就被眾多途人圍觀，更被一位叔叔偷拍。
她說：「有個叔叔直頭企咗喺我兩步距離嘅位置，碌大對眼望實我影相，我就好尷尬，然後我就望住我同事，同事就『睥』番佢，跟住佢就走咗，但係佢行多兩步遠少少喺度扮自拍，但其實係影我，就係遇到啲咁的事，咁可能係我太靚啦，冇辦法，哈哈！都幾搞笑。」
除此之外，時差亦嚴重打亂她的嚴謹飲食時序，「嗰邊慢香港5、6個鐘，我哋8個鐘飛機，跟住等6個鐘轉機，跟住再飛多5、6個鐘，到達咗之後個時間已經亂晒，導致食嘢時間都亂晒，譬如夜晚12點幾時仲喺度食晚餐，跟住零晨3、4點仲喺街度行。心諗：『哎吔！大鑊啦！』」
「放棄人生」入鄉隨俗
最後她決定「放棄人生」，實行入鄉隨俗，不過回港後又要再次適應，「我記得返到嚟嗰日係半夜，好肚餓！點解會好肚餓呢？諗諗吓，係喎，布達佩斯時間係食晚飯喎。」不過回港後Gin Lee便要回到她嚴謹的減肥餐單，「因為嚟緊要拍新歌MV，又要即刻入錄音室錄音，跟住有啲拍攝工作，所以呢幾日要好勤力準備錄音同減肥。
|
搜尋新聞
