【本報記者報道】日前,歌手洪助昇(Aiden)突襲歌迷為他慶祝出道1周年的應援聚會時,已預告將會推出新歌,MV更會有突破性演出,昨日(29日)全新派台作品《單曲循環症》MV正式上架。
新歌沿用Aiden出道歌曲《憑實力單身》班底,徐浩監製、阿木填詞,他憶述跟詞人提到現代人的愛情故事均大同小異,「發現好多人習慣咗一個人喺自己身邊,從而夾硬繼續喺埋一齊,所以呢首歌主要係用一個比較理性嘅角度討論喺愛情入面,你繼續被情感牽住,但最後未必係一個好嘅結果。」
為了呈現這種憤不顧身的愛情,MV導演以「跳崖」方式呈現,「喺愛情入面,就好似跳崖咁跳咗入去一段關係,但往往都係自己不斷受傷,雖然明知會受傷,但情感會沖昏我哋嘅頭腦,冇好理智分析繼續落去雙方都會受傷,同時亦冇好好保護自己。」
MV連續拍攝24小時,Aiden早上6時便要出發,第一場更是浸冰戲份,拍攝後他差點以為自己會猝死,「拍嘅時候一開始好興奮,但拍落去發現身體呃唔到人,拍嗰日好凍,導演又不斷加冰,拍完呢場有一刻發現自己心跳好快,嗰刻好驚自己會猝死,但休息咗一陣就冇事可以繼續拍攝,我都唔係好夠膽俾同事知道,因為佢哋好錫我,一定要我去檢查咗先。」
跟Zoe咀對咀餵水
除此之外,Aiden直言有一幕更激的戲碼,「就係同MV女主角Zoe(余潔瀅)咀對咀餵水嘅戲。」Aiden自爆對上一次拍接吻戲已經是7年前,「太耐之前啦,我唔識得點錫,已經唔記得咗。」不過因為跟Zoe是朋友,所以又變得放心,「幾年前我同Zoe喺一個acting class(演技班)入面認識,因為大家係朋友,所以拍嘅時候我都好怕會笑場或者尷尬,好彩當時大家都好沉醉喺個故事入面,我亦都同自己講:『要好好咁呈現呢場咁刺激而有意思嘅戲份。』」
最後這幕互餵水的戲碼NG了7至8次,「因為第一take啲水湧出嚟好似瀑布咁,所以要好好控制水嘅流量。同埋對於我呢一種『憑實力單身』嘅人嚟講,對上一次錫係7年前嘅人嚟講,今次真係一件幾衝激嘅事。
|