【本報記者報道】無綫劇集《逆天奇案2》前晚（8日）一集，復合成功的Nic Sir（黃智賢Ben飾）在船上炮製驚喜，向Hazel（蔣祖曼Joman飾）求婚。談及船上求婚場口雖然氣氛浪漫，但拍攝過程其實相當辛苦，拍到身水身汗 爆黃智賢練出絕世零汗神功。
蔣祖曼受訪時透露：「上輯都有拍過船上戲，有咗上次經驗都知道時間比較趕，所以我哋做足準備。當日天氣係超級無敵咁熱，雖然我着到唔係好厚，但我真係好大汗，拍到身水身汗，反而阿Ben佢就好犀利，佢仲要着西裝三件套，但佢真係完全冇汗出，佢話拍古裝拍到已經習慣熱嗰種感覺，話自己冇汗出㗎喇，呢啲真係經驗嚟，我都好希望練到冇汗出！」
蔣祖曼亦替幕後感到辛苦，她說：「我哋演完戲都話可以用遮遮吓，但係幕後工作人員係唔可以擔遮，最慘係Cam man（攝影師），逢親拍船嘅嘢佢哋係最辛苦，因為要望住細嘅Mon(熒光幕)，佢哋係最易暈船浪，佢哋一日未冧低，我哋都唔可以冧住，好佩服幕後一班工作人員。」
56歲黃智賢半裸晒爆肌吸Like
講到今輯與Ben再續前緣，蔣祖曼坦言大家有晒默契：「上輯比較着重Hazel工作上面嘅嘢，今輯嘅重點就喺感情上面，所以同Nic Sir會多啲親密戲，阿Ben不嬲都超級照顧拍檔，無論戲內戲外佢都會幫你諗埋，諗咗你先再諗自己，所以同佢拍嘢係好開心同放心。」
蔣祖曼續說，與Ben很有緣，現在兩人於另一套劇再次合作。另外，劇中打戲連場的Ben在IG上載做Gym相，相中阿Ben半裸大晒爆肌身材，胸肌和腹肌相當結實，完全看不出已年屆56歲，Ben留言：「練的是身體；磨的是鬥志！為新角色裝備自己！」該貼文勁吸逾5,000Likes，並吸引大堆圈中好友楊茜堯、袁偉豪、陳煒等留言，大讚：「勁！」、「嘩Ben 哥哥有料到！」、「勁抽」。
李龍基收埋6層樓 網友笑戲如人生
前晚一集另一焦點人物非飾演Nic Sir爸爸福伯的李龍基莫屬，劇情講到他無辜捲入黑社會非法收樓事件，意外爆出福伯原來是大地主，除了自住2個單位和2個舖位外 ，還隱瞞Nic Sir收埋了6個舊樓單位！該場戲播出後引起網友關注，曾有報道指投資有道的基哥名下有7個物業，更有「深圳樓王」之稱，有網友笑言基哥戲如人生，留言：「戲裏戲外都係大地主！」 |
您可能有興趣:
|
搜尋新聞
