【本報記者報道】陳法拉今年3月誕下細仔，生完B後火速瘦身，她快閃香港出席活動，同場還有韓國完美男神朴炯植，法拉當晚就飛返美國湊仔。她笑說，大女雖然好錫細佬，有時行為特登曳，吸引爸媽注意，法拉開心分享一家四口生活趣事。

法拉讚老公照顧小朋友好叻，花好多時間畀小朋友，不過法拉笑言工作上嘅嘢較少同老公講，法拉指有次阿女見到屋企附近酒店掛咗佢有份演出嘅電影海報，阿女每次經過都話呢間係媽咪嘅酒店。

指因不懂上海話 無緣演《繁花》

法拉暑假即將開拍新戲，對手係金球影帝Colin Farrell，新戲仲會返香港及澳門取景，法拉開心返香港拍戲，好掛住香港嘅朋友，佢到時逗留約兩個月，法拉今次飾演一個喺澳門賭場工作嘅女仔，後嚟識咗男主角，二人惺惺相惜。

法拉早前透露曾跟王家衛接觸，因唔識上海話無緣參演《繁花》，法拉亦有睇《繁花》，讚拍攝好靚，同時好欣賞胡歌嘅演出。