■梁雁翎在北京居住，返港宣傳接受無綫許文軒訪問。

梁雁翎(Annie)日前作客TVB娛樂新聞台節目《StarTalk》，接受主播許文軒(Edmond)專訪，大談將在港開演唱會感受及回顧昔日歌唱生涯。梁雁翎表示近年定居於北京，從事保險行業，她笑說：「我一路習慣打兩份工，以前飛圖時期都係，我係股東，又係歌手，平時又要做埋化妝、製作、統籌等，就連搵Model都關我事，可能我辛苦命，所以嚟緊我除咗保險之外，仍想繼續唱歌，安排到就去做。」

價值觀同興趣相同

Annie於專訪中多謝舊老闆葉志銘先生，她説：「我地有聯絡，我有叫佢睇我今次演唱會，佢係我恩人又係我老闆，佢都幾前衞同聰明，我喺佢身上學到好多嘢。」問到Annie於飛圖時期收入可觀，一下子離開樂壇會否可惜？她說：「嗰時一年都有七八位數字收入，咁我有兩份錢，股東有分紅，歌手亦有收入。我工作咁耐，見辛苦咪休息下先，我先生全力支持我，佢同我結婚時，我已經係一個好紅嘅歌手，佢認同我份職業。」她又説：「以前講過話想生三個，但面對現實之後，真係好難，不過我同我先生嘅價值觀同興趣相同，依家有冇小朋友都冇所謂，不是太重要。」

有獎同市場無關係

入行多年賣碟成績不俗，又貴為卡拉OK天后，但梁雁翎竟然未有得到任何獎項嘉許，她説：「我唱國語歌，但香港喺廣東歌市場，又點會畀一個唱國語歌嘅人獎項，其實有獎同真正嘅市場係冇關係，(想攞獎？) 我又冇諗，賺到錢仲好啦！」