前日是周潤發(發哥)63歲生日,今年發嫂(陳薈蓮)悉心包場為老公搞神秘生日會,請來發哥主演的電影《無雙》監製黃斌、導演莊文強,以及齊齊成為「行山友」的廖啟智(智叔)、方中信,安樂電影公司老闆江志強和攝影師潘耀明等好友外,當中最驚喜更是四哥(謝賢)現身。
提早到酒店打點
發嫂前日提早個多小時已到酒店打點,生日蛋糕是她和發哥二人擁着坐在公園長凳自拍的造型,感覺溫馨非常,而發哥亦坦言老婆驚喜安排成功:「以為只係幾個朋友食飯,完全唔知有老闆、監製、演員同四哥,好開心。生日願望係可以繼續跑山見神仙,喺山過美好生活,好開心㗎!」
孖四哥扭腰跳舞
至於同樣風趣的四哥,面對發哥教他原地慢跑時,不時古靈精怪,又和發哥鬥fit;當智叔即興獻唱《上海灘》時,發哥邊和他自拍邊合唱,唱了幾句更挑機邀四哥扭腰跳舞,四哥自然奉陪。發哥表示,二人對上一次飯聚是個多月前,他好想將行山樂趣帶給四哥,所以和對方定了「十月之約」!
發哥說:「十月秋風起上山舒服啲,等佢唔好話自己年紀大無嘢做,下半世就係照顧好謝賢一個,依家由五分鐘、10分鐘跑起……佢細我兩歲,練到十月一日就可以帶佢上山見吓神仙。」