歌手陳柏宇（Jason）與趙勁皓（King）近年進軍飲食界，有份投資的火鍋店生意理想，最近再開分店。前晚兩人出席剪綵活動，Jason的太太符曉薇陀住BB都照樣撐場，而King的老婆盧頌之亦抱住愛女現身支持老公。King透露今次投資約500萬，坦言開分店是計劃之內，年尾更會將業務版圖擴展到荃灣。Jason自言一直都想學做生意，奈何仍未有機會，不過他覺得自己能力不一定要高，最重要是有好拍檔幫手。

對拍檔非常信任

被問到合作以來可有拗撬，兩人同時搖頭，King表示：「成班partner都part咗幾間舖頭七年左右，大家有意見唔啱，但會融合到，交換意見想做好件事，唔會有拗撬同錢銀糾紛。」他又大讚Jason是「超級好人」，對拍檔非常信任，不會對錢銀用途過問太多。之後King講到現時的火鍋店、中菜館及健身房等生意，Jason通通都有參與，Jason聞言即笑說：「健身房我參與嚟做gym啫！」而他亦慢慢融入King與共同朋友的圈子，一整班朋友都無秘密，King笑謂：「我哋乜都講得，成班都喇叭口，每次同大家講秘密都話千祈唔好同人講，最後都係講出去，唯一無爆出去係Jason要做老竇囉！」Jason則表示其實自己不迷信「BB未夠三個月會小器」這個說法，太太更一早四圍同朋友分享懷孕喜悅。

諗定了教女方式

Jason這位準爸爸果然對愛女出世充滿期待，昨日去到電台宣傳新歌《無限大》時，Jason繼續講起老婆肚裏的B女，指很多人誤以為新歌是寫給囡囡的作品，但其實非也。然而這個美麗的誤會卻給予他啟發，令他有了下一張專輯的靈感，Jason直言：「監製想我新碟裏面多啲揀歌，甚至作曲，呢排講得最多就係囡囡，所以新專輯同佢會有好大關係。」

雖然愛女還未出世，但Jason已經諗定自己一套的教女方式，主要是凡事出發點要好、不要因為怕犯錯而失去勇氣嘗試，以及知錯能改並反思犯錯原因。他又分享自己對囡囡的期望，並謂：「我唔需要佢飛黃騰達，但最緊要佢係一個識得幫助同關心別人嘅人。」