歌手鍾鎮濤（阿B）昨日到商台接受訪問時透露，新碟推遲到本月26日出街，因是全世界製作：「在香港、馬來西亞錄音，後期在美國及德國印碟，所以遲咗。」

提到11月底的紅館騷，阿B表示歌單已定，為了令到驚喜歌迷，很多細節要保持神秘，問到是否有新嘢？他說：「唔知呀，賣關子，講唔到咁多，再講就要除衫㗎啦。（騷肌？）唔係呢種。」

嘉賓溫拿鍾懿

阿B只肯透露嘉賓有溫拿，問到女兒鍾懿會否上台？他說：「梗係會啦！一直演出都會帶佢表演，可以一齊成長。」阿B又表女兒會有一首獨唱歌，不過她想唱的歌自己不會批准，因為是他的演唱會：「啲人都係想聽舊歌，我話只可以揀廣東話或國語歌，但佢想唱英文歌，我就話要揀一隻唱第一句大家就知係咩歌先得，佢都搵咗一首，到時會唱英文老歌。」問到會否與女兒齊跳舞？阿B笑說：「佢有教我啲動作，但我做唔到，太高難度。」<文>娛樂部