藝人劉心悠、馬國明（馬明）、羅霖、謝雪心及康華等昨日現身尖沙咀，宣傳《宮心計2深宮計》並舉行義賣活動。總監製梅小青宣布收視再創高峰，於內地的網上平台點擊率已達21億！

心悠受訪時表示很興奮能參與這套「好勁」的劇集，打算安排慶功飯局。同劇演員早前在網上貼出兒時肉照慶祝，但一向保守的心悠就笑言：「我唔出身，但出力，嚟緊慶功我會捐8,888蚊畀劇組抽獎，好意頭嘛！」

接拍內衣品牌廣告

劇集成績理想，亦帶挈心悠增加不少工作，當中有內衣品牌找她拍廣告，令她大感驚訝，笑稱可能是由於唐朝效應，她說：「我都唔係劇集入面最偉大嗰個，所以真係有啲受寵若驚，因為我不嬲都唔係行性感，係入咗行10年先接受到露背。」

受無綫「限露令」影響，今次劇集的戲服不算性感，宮廷服領口大多以平口設計，但心悠就指有時會有烏低身行禮的動作，對她的性感底線來說已是踏出一大步。講到接拍內衣廣告與否，心悠仍未有定案，指經理人與對方接洽當中，自己亦不敢問太多。被問會否着喱士或透視內衣款式等出鏡，心悠直言：「喱士內衣我都有，方便襯衫，露條邊出嚟好靚。但自己平時着就無問題，要騷出嚟真係一個好大嘅關口。（三點式呢？）我去游水都係着運動型泳衣，三點式可能要10年後先敢。」

呻無時間睇世界盃

劇集男主角之一的馬明則希望內地點擊率會持續上升，但就指以分享裸照來慶祝的方式應留給其他男演員，他寧願效法心悠，自掏腰包派錢予劇組人員抽獎，金額到時再決定。

馬明近日同時開拍《白色強人》及《C9特工》兩套劇，自言對外間發生甚麼事都一無所知，本身熱愛足球的他，就連世界盃都無時間睇，馬明表示：「淨係可以睇賽果，有時留意下精華片段。我又無話捧邊隊做冠軍，今年對法國、德國同阿根廷都幾失望，反而巴西踢得似番啲樣。我喺香港大，梗係鍾意英格蘭，但若然佢踢得唔好，我都唔會盲撐，總之最緊要都係想睇場好波。」

另外，康華自爆因要照顧父母寧願守dry，已經10年沒拍拖，加上未遇過合適的，笑言一把年紀，一直隨緣！她又表示很高興在劇中的感情線得到共鳴，亦多了一些出埠工作機會。