歌手吳業坤（坤哥）前晚在紅館開騷，表演期間拉高上衣騷腹肌，更被表演嘉賓的JW（王灝兒）狂摸，十分搞笑，事後坤哥笑言：「估唔到佢咁猴擒。」 <文>娛樂部

吳業坤（坤哥）《吳業坤 小句號 演唱會 2019》前晚在紅館開騷，吸引不少圈中好友捧場，包括李佳芯、蕭正楠、鄭世豪、歐陽震華、梁競徽及樂易玲等，開三面台的坤哥穿上鮮紅色衫，甫開場就吊在半空獻唱，他表示演唱會主題是指人生的舊章節畫上句號，即將展開新一頁，其後與側田合唱《凱旋門》，坤哥感謝側田每次開騷都幫忙，側田就表示：「我一定要幫有實力嘅人，但你瘦咗咁多嘅？變咗偶像派？」坤哥笑說：「我不嬲都偶像派嚟㗎啦。」

模仿古仔唱《今期流行》

到跳舞環節，坤哥與ViuTV組合MIRROR出場，又跳又唱演繹《ASAP》，然後坤哥換上紅色背心戴起墨鏡騷健碩雙臂，模仿古天樂獻唱經典歌曲《今期流行》，期間當然少不了「拜神」舞步，引來台下笑聲不斷，一曲過後坤哥向MIRROR說：「難得嚟到講吓感受先。」然後再讓他們逐一向觀眾打招呼，最後坤哥說：「大家好，我係TVB嘅吳業坤。」請MIRROR落台後再向觀眾說：「佢哋走咗啦，可以望番我，吖！原來樂小姐（樂易玲）都喺度，我仲叫咗ViuTV嘅人嚟，你唔介意？死啦，佢好似好鍾意。」

其後坤哥表演他苦練多時的舞步，跟幾位舞蹈員在台上鬥jam舞，跳到成身汗的他笑說：「好熱，幫我吹，風扇，真係笑到有腹肌。」然後拉起背心露出腹肌。

台上鬥舞跳到成身汗

及後JW（王灝兒）以嘉賓身份出現，指坤哥為個唱狂減廿磅，要求他再次除衫給她摸腹肌，更出手解開坤哥衫鈕，露出一排腹肌，JW完全不理會，不客氣地是用手狂掃，十分搞笑。個唱尾聲，剛踏入29歲的坤哥要求在場觀眾合唱生日歌，補祝他本月18日生日。

舊愛Aka送生日祝福

坤哥騷後受訪時表示很開心完成演唱會，還應要求脫去T恤晒肌肉，他表示事前擔心票房，怕無人買飛，但出場見到燈牌後好安心，如釋重負。問到有否請了所有女朋友前來捧場？他說：「大家一眼睇完，坐得台下都係最愛。」他指有請舊愛Aka（趙慧珊）來睇騷，但因對方有工作沒來，但都有同他說生日快樂。

至於JW當眾除他衫摸腹肌，坤哥笑言：「估唔到佢咁猴擒。」他又自爆綵排時影了一輯不着衫的雄風相，之後會逐張給大家看。