文/ Aka 攝/ Aka

疫情持續，對於喜愛去旅行嘅香港人絕對係惡夢，所以今次我地同大家嘗試係香港搵下去旅行嘅感覺。雖然日本、韓國、台灣、泰國一定係香港年輕人最愛去嘅地方，唔少人更加覺得上述嘅地方先係佢哋嘅鄉下。今次到訪嘅餐廳並唔係代表上述嘅地方，但亦都係香港年輕人十分喜愛嘅地方：越南。

最近銅鑼灣新開咗一間裝修得好有異國風情嘅越南餐廳，難得食越南菜嘅餐廳咁靚，經過見到好難唔比佢個裝修吸引。二樓掛滿一個一個嘅彩色燈籠，有種古樸氣色，令人有置身於越南會安嘅感覺，打卡簡直一流。店名Lua（攞。啊），係越南文中「稻米」之意，樓高兩層，裝修古風得黎又有點摩登嘅感覺，而且坐位闊落，整體感覺十分寬敞舒服。

講到越南餐廳，Pho（河粉）一定係標誌性食物，去越南唔食Pho都唔好話自己去咗越南。所以一定要試下佢嘅生牛肉雜錦湯河，餐廳標榜絕大部分食材和調味醬料都是從越南當地運來。河粉檬粉亦係每日自家新鮮製造，爽滑唔易斷。湯底標明唔落味精，用豬牛骨肉煲出精華，味道香濃之餘亦十分清甜，配上鵝蒂、青辣椒、青檸、九層塔、芫荽、辣椒等豐富嘅香料，味道更有層次。除左有安格斯牛肉，也配上牛扎肉 、牛肉丸、牛肋骨、牛皮等，牛肉腍而嫩，扎肉和牛丸嘅口感同坊間稍有不同，牛肋骨肉味濃郁，牛皮爽滑，簡直係牛魔王嘅盛宴。配上地道特色食法，先唧青檸汁，再加甜辣醬同海鮮醬提味，更加引出湯的甜味和肉的香味。

另外，去越南當然唔少得食法包，小篇就叫左個經典口味啦！越式法包係越南嘅一種特色菜。當地人食用時，常常加入帶甜酸味嘅蘿蔔絲醃菜、新鮮青瓜、芫荽、辣椒，塗以豬肝醬、奶油，再加入各種肉片，通常當作早餐、小吃或宵夜。法包烤嘅時間控制得剛剛好，外脆內軟。豬肝醬味道突出，但比想像中溫和，而且十分細滑，配搭蘿蔔絲醃菜和青瓜，口感清新。越南扎肉作為主要材料，本身就有著複雜的味道，加上莞荽提味，味道獨具風格。當各種材料集合埋一齊，無論味道和口感都非常豐富，值得慢慢細味。

粉皮入面包住嘅係豬肉春卷，外面滑捋捋，入面脆卜卜，食落幾特別，做法同口感都十分似中式炸兩，配上酸酸辣辣嘅越式醬汁，十分開胃。

炸軟殼蟹脆卜卜，啖啖蟹肉有蟹嘅鮮味，同鹹蛋黃醬配搭簡直無得輸，香口得黎又唔會膩。

一道比較少見的菜式，夜香花味道不重，但卻有獨特的香味，配合獨家醬汁酸酸甜甜得黎又十分清新。

荔枝味道清香，配合綠茶用嚟解膩一流

越南咖啡特有的香味，加入煉奶令口感順滑，而且中和咗咖啡苦味，風味別樹一格。

打卡位都係重點，紅色門面、特色打卡牆、沉木枱，都係滿滿嘅越南風。

重點打卡位係二樓露台嘅「假樓梯」位，天花板掛滿五顏六色嘅燈籠，但只有兩張枱，想食住打卡嘅就記得要book位啦。