王菀之（Ivana）與張敬軒這對超強組合再度合體，前晚移師到澳門演出，軒仔在演出期間險些甩褲，幸Ivana醒目為他擋着，軒仔又不慎被咪撞到嘴唇，而且又要犧牲將腳毛全部剃光！Ivana則由過年至中秋食不停，所以來不及減肥演出！
Ivana與軒仔前晚在澳門舉行演唱會，今次他們的造型有部份是全新設計，軒仔在台上自爆為了穿一條很窄的褲要剃腳毛，他笑說：「係呀！我今日冇晒啲腳毛，為咗呢條褲我花咗成個鐘剃晒啲腳毛，因為條褲好窄身又多拉鏈，經常夾到啲腳毛，所以要剃光腳毛！不過講剃腳毛都有掌聲，相信我都係第一人！」此外，二人又落台與觀眾握手，不少觀眾爭相擁到台前搶握手位，在演唱會近尾聲時二人更一時感觸來個情深擁抱！
握手環節被搶咪
在演出期間軒仔險些當眾甩褲，幸而Ivana醒目為軒仔擋着，好讓軒仔弄好褲頭再演出，軒仔笑說：「當時我唱唱下歌，突然聽到條褲『啪』一聲，條褲好似鬆咗，幾驚甩褲呀！」在旁的Ivana插咀說：「你咪賴條短褲，之前你着係鬆，而且窄咗你坐低唱歌我都聽到爆線聲，好在我遮住你。」軒仔乘機反駁Ivana說：「你點止遮住我，成隊Band都畀你遮到啦。」另外，軒仔在握手環節時被人搶咪，不慎撞傷嘴唇，他笑謂因為有人想搶他支咪，他覺得支咪比他更重要，所以角力下撞到嘴唇。
今次演唱會他們的造型有部份是全新訂造，Ivana亦換上一頭短髮，軒仔笑指二人近日的體形上有些不同，因為大隻咗！
食月餅身體發福
Ivana說：「我大隻咗係因為健身，其實喺2月香港站演出時候，係近新年期後時間，我已經開始戒口，我應承所有設計師唔會大食，不過我就由紅館完騷後食到而家，所以我減唔切，今次澳門站係中秋節期間，我又食咗好多月餅！」
而軒仔則自言大隻在下半身！令手多多的Ivana偷襲拍打了軒仔的肚腩一下！軒仔又表示，今次大家演出的狀態很理想，他們希望能繼續有其他地方巡迴演出！ |
搜尋新聞
