湯駿業聯同黃妍在元宵節開騷。

前晚正月十五元宵佳節，演而優則唱的舞台劇男演員湯駿業（AhDee）聯同去年獲樂壇多項新人獎黃妍（Cath）舉行「湯駿業（AhDee）x黃妍（Cath）-《吃貨的人生》音樂會」，以音樂形式重現音樂劇《吃貨的人生》。
兩人先以《只談喜愛不談戀愛 》、《約定》、《築地給林》作開場曲，雖然有別於音樂劇的有聲有畫，他們今次以歌聲為主，但不少粉絲都邊聽邊憶起音樂劇的情景，大家都聽得相當投入。AhDee及Cath其後分別唱出《寂寞的總和》、《笑容迷路了》、《貪睡的人》、《孤兒體質》和《檸檬的鹼性》等歌曲，粉絲都聽得如癡如醉。

重演吃貨人生

對於今次以聲音「重演」《吃貨的人生》，AhDee花了不少心思：「練歌時候都好開心，因為有好多arrangement都係新嘅，今次以音樂嘅形式去唱，原來都好正、好好feel！」
而最令AhDee開心的是聽眾的反應：「我見到頭先大家都好專心、好enjoy咁去聽，我自己都好享受。」AhDee更笑言可以同阿Cath一齊在台上吹水閒談，感覺都很開心，他更希望未來有機會可以再唱多些歌給大家聽。

勾起很多回憶

至於Cath就指今次的演出，勾起很多回憶，她說：「因為我覺得呢套劇係我出道之後一個好大嘅嘗試，因為我以前未試過舞台劇，但係喺呢個劇度，我學識咗好多嘢，亦都見到自己需要進步嘅地方。」
雖然兩人去年因為合演而認識，但她自覺與對方已像好朋友一樣，可以互相開玩笑，而且很有默契：「我覺得喺呢元宵佳節再見返佢，係一個頗完美嘅節目，再同AhDee一齊合唱，勾起好多回憶，而且可以喺一個咁美麗嘅地方同啲粉絲聚吓，唱歌俾佢哋聽，真係一個好好嘅元宵節目。」