由劉丹、羅樂林、黎彼得及陳榮峻組成「大四喜」昨日齊齊出席活動,黎彼得大爆酬勞以劉丹分得最大份;而林淑敏則表示靠「大小姐」角色帶挈賺了不少外快,不過她笑言未賺夠,愈多愈好。<文>娛樂部<攝影>梁迺枬
劉丹、湯盈盈、滕麗名、呂慧儀、林淑敏(Mandy)等昨日到元朗出席無綫最新節目《PARK YOHO週末速遞》的造勢活動,在《愛.回家之開心速遞》飾演「大小姐」的Mandy,以一身夏日look到場,笑言受「大小姐」角色帶挈賺了不少外快,對於添食四集特備節目,Mandy直言感到十分榮幸,更笑言未賺夠,希望能愈多愈好。她說:「好多謝公眾、網民咁支持我哋,我哋都好聽從民意,睇完啲comment我都真係會去改善,幕後亦都好聽民意,令節目愈來愈好。」
躲廁所練歌
談及Mandy在廣告中有份參與rap演出,她說以唱歌形式演出是第一次,而Mandy表示私下也躲在廁所練習:「登台都係唱歌多,rap都係當玩。」提到劇中由劉丹、羅樂林、黎彼得及陳榮峻組成的「大四喜」大受網民歡迎,問到Mandy會否想組女子組合rap?她說:「唔敢諗,我驚會佗衰家,啲人睇完會嘔!『大四喜』有好多新鮮感,同香港人講佢哋仲係好後生,呢個年紀都仲做到好多嘢。」
小糯米伴舞
劉丹、羅樂林、黎彼得及陳榮峻組成「大四喜」昨日齊齊在台上合照,四人早前憑人氣殺出香港,到澳門以組合形式登台,問到可有工作要求四人以組合表演?黎彼得笑說:「多到數唔到,推晒之嘛!我哋不會咁濫。(是否酬勞要分四份唔吸引?)我哋分大細份,丹爺的最大份!」 四人又表示,今次再以rap宣傳節目十分開心,問到有否相約練歌?黎彼得笑說:「各有各練喎,在廁所練!陳榮峻就同老婆(吳香倫)在家中晚晚抱住練囉,丹爺就抱住個孫女練!」提到孫女小糯米,丹爺即笑不攏嘴,問到孫女可認得他?丹爺笑說:「跳埋舞添!但無唱埋一份,可能佢諗緊爺爺幾廿歲人都唔知做緊乜嘢!」 |