歌手漢洋前晚舉行個唱尾場,獲眾星齊撐,漢洋表示今次開騷是「執身彩」,因第一場去得太盡,險些失聲,幸而大步檻過,所以可以盡情唱。對於個唱反應佳,問到可會開part 2,他表示因工作排滿了,所以未有考慮。<文>娛樂部
漢洋一連三場的《友共情三十載演唱會》前晚舉行尾場,請來好友吳國敬、范振鋒、肥媽及李麗霞(黑妹)擔任嘉賓。范振鋒指當年漢洋在台灣非常紅,兩人經常結伴去卡拉ok:「點解我哋咁鍾意去卡拉ok,因為我哋好鍾意研究音樂,我屋企人今晚嚟咗,梗係要咁講啦,我哋無飲酒,只係飲珍珠奶茶。」
肥媽收花挺胸
剛由雲頂登台返港的肥媽和黑妹當晚特地趕來,肥媽大讚漢洋乖仔、聽話又尊重長輩,期間黑妹及肥媽獲贈玫瑰,黑妹笑言:「我支花好似我咁謝謝哋。」肥媽就挺胸說:「有啲花謝謝哋都靚㗎,我雖然未到70歲,但都好堅挺,點解漢洋着裙吖?因為佢都好堅挺。」引來全場爆笑,三人隨即合唱《Stand By Me》。 最後,漢洋請了台下所有藝人好友上台一齊合唱周華健的《朋友》,而早前因肺炎入院的吳香倫剛出院,也與老公陳榮峻捧場及上台,十分畀面。
封嘴拒談洪欣
受訪時,漢洋表示今次開騷是「執身彩」:「第一場去得太盡,影響咗把聲,於是臨急抱佛腳,搵修女幫我祈禱,所以今日大步檻過,今晚去到最後已經放膽去唱,其實三晚之中最滿意今晚。」 對於被傳婚變的洪欣曾到場欣賞其個唱,漢洋立即封嘴:「我從來都唔會問呢啲。」問到哪個嘉賓最難請?他表示沒有對外公布嘉賓名單:「我同佢哋講有時間就嚟,嚟唔到都得,啲嘉賓多到排唔晒。李國祥除唱歌之外,仲幫我換埋衫,着襪着鞋,好感動,小雪又特登飛過嚟,Amy(譚嘉荃)做埋監製,仲好似我助手咁。」 問到現場反應好,有否想過再開part 2,漢洋說:「我無諗,因為之後要忙其他工作,今年有兩部電影要搞,又要搞音樂,仲有好多project,已經排滿了。」 |