文、攝/ ALFRED

早排天氣又濕又焗，咪成日飲凍飲囉，飲到腸胃唔好口又臭面又灰，我個中醫老婆當然唔會放過任何踩我既機會啦：「你暑濕呀，人又肥又腫又口臭，飲一個星期冬瓜薏米水啦，如果唔係執一個星期藥你食…….。」

「第一，我真係好怕中藥；第二，冬瓜薏米水乜都唔加真係好寡架老細。」

「加隻雞得唔得呀？」

「嘻，你有本事煲到無油咪得囉。」

「老婆，我想話你知你老公係唔大得㗎。」

冬瓜薏米燉鮮雞羊肚菌

羊肚菌：性平、味甘，具有益腸胃、消化助食、化痰理氣、補腎、壯陽、補腦、提神之功能，對脾胃虛弱、消化不良、痰多氣短、頭暈失眠有良好的治療作用，其實羊肚菌同雞油係好朋友，佢超級索油，而索滿雞油既羊肚菌係可以好食到我放棄減肥，只要一些小小秘技，隔些少面層既油就可以神不知鬼不覺，你有你飲靚湯，我有我食邪惡靚菌啦喂。

材料：

1. 冬瓜一圈，去皮去籽

2. 鮮雞一隻，飛水索乾加半茶匙鹽搽勻全身，閒置30分鐘

3. 羊肚菌10隻，溫水浸2小時，壓乾水備用

4. 薏米1錢

5. 薑一小片

做法：

1. 將羊肚菌全數放入雞肚內，用牙籤將雞尾密封

2. 冬瓜先放入燉窩，再放薏米

3. 最後將原隻鮮雞放入，加2.5升大滾水

4. 隔水蒸3.5分鐘

5. 小心取出鮮雞放碟上，拿走牙籤，開膛即可食用，雞肉嫩滑，羊肚菌香濃

6. 湯面少不免有少許油脂，輕輕用隔油匙隔走便成

註：此菜只可用燉，否則冬瓜燶底，雞油四溢就過不到關了