一連兩場《薛家燕愛你無限60年演唱會》前晚在紅館舉行尾場,不少圈中好友如徐小鳳、劉松仁、邵音音、潘迪華、陳敏之、樂易玲等來捧場。嘉賓還有張智霖(Chilam)、譚詠麟(校長)及草蜢。
曾於劇中與家燕姐飾演母子的Chilam,以初哥哥造型吹住哨子出場合唱《分分鐘需要你》,家燕姐大爆Chilam闊佬:「有次去大馬登台,佢請我食一條六千幾蚊嘅魚,叫『忘不了』。」Chilam以行動代表說話,即場與家燕姐來個深情擁抱。其後家燕姐以勁歌熱舞向已故好友張國榮、陳百強及羅文致敬,又感激徐小鳳姐給予不少紅館開騷心得。
草蜢跳十字舞
家燕姐又完成心願與譚詠麟合唱《愛人女神》,校長笑笑口說:「家燕姐出道耐過我,已經一個甲子,我由60年代黑白電視已經追睇你嘅作品,我係你嘅粉絲。」跟住校長突然在褲袋拿出粒癦黐在額頭說:「呢粒癦如有神助,並唔係等閒之輩,今時今日仲可以有laser放射出嚟,我粒癦就黐上去,你粒癦應該有根。」演唱會尾聲,草蜢及家燕姐合唱《忘情森巴舞》,最後教全場觀眾跳十字舞。
男友睇足兩場
慶功宴上,家燕姐心情仍然興奮:「呢個演唱會令我畢生難忘,睇到三個子女上台唱歌,真係忍唔住喊。」他又自爆男友連續兩晚都有捧場,但沒入後台,家燕姐說:「仲未有時間介紹畀七公主認識,或者遲啲安排食飯。」再問確實日子,她說:「唔好咁快,2020年先,我仲以為你哋講結婚。等我搞埋選婿大會,搞掂珊珊先。」再追問結婚一事,家燕姐說:「坦白講都唔會結婚喇!我咁嘅年紀仲結乜嘢婚呀?做吓朋友都開心。」至於與男友是否純純的愛,家燕姐點頭答:「係!」完成個唱後,家燕姐表示會與男友和仔女去日本旅行。