林峯、鄭嘉穎、譚耀文接受香港開電視主持馬梓軒專訪，分享拍攝新戲《P風暴》點滴。該片還雲集多位型男，包括古天樂（古仔）、林家棟、張繼聰等，不過談及戲中最chok的一位，嘉穎直指非林峯莫屬：「你一着嗰套紫色西裝，真係無人夠你嚟，即刻chok爆咗！」此時林峯謙虛稱：「我都夾硬去carry吓啦，我本身諗住carry唔到！」
初為人父的嘉穎透露，早於兩年前與阿譚合作音樂劇期間已嚮往當爸爸，但阿譚則反駁：「雖然你嚮往，但當時你話唔好搞我！」嘉穎笑言：「咁又唔係，只不過煮到埋嚟就食啦！相信阿峯都係咁諗架啫係咪？啱timing，遇到啱嘅人就去做囉！」嘉穎更為兒子鄭承悅（Rafael）遺傳了自己的個性而哭笑不得：「我個仔有我啲脾氣，總之佢周身郁唔合作，你叫佢去東佢就去西，我希望佢會搣甩呢樣嘢！」
譚耀文不怕被比較
該片於搭建的監獄場景拍攝，其中譚耀文飾演的懲教署監督，不期然令主持William聯想起經典電影《監獄風雲》。阿譚被問到會否怕觀眾將角色與《監》飾演懲教署人員的張耀揚作比較，阿譚即鬼馬地表示：「唔怕！阿Roy嘛，我地friend嚟嘅，唔怕！其實每部戲都唔同，劇情發展唔同，只要盡力做好每個角色就得！」
首演反派樂趣甚多
林峯和古仔相隔18年再度合作，林峯感激古仔給他機會及教導。向來予人乖乖仔形象的他，戲中與阿譚同演反派，更發現演反派樂趣多：「今次真係第一次嘗試演一個反派人物，我都同阿譚講原來演反派係咁過癮！」
林峯與女友張馨月現在拍拖時常被野生捕獲，他卻甚少與傳媒分享感情事，為此林峯解畫：「一部電影作品有咁多台前幕後嘅人，用咗咁多個月咁辛苦去拍，然後透過我哋去宣傳作品時，如果將視線投放喺我嘅私人嘢，我覺得好唔專業！」最後林峯強調，若自己將來成為人父，會很樂意跟大家分享家庭生活。
搜尋新聞
