香港人對「築地市場」都好熟悉,近年仲好多日本餐廳寫明由築地直送海產,所以個個必定覺得築地係賣魚產嘅。不過,魚產以外,其實好多廚房用具、蔬菜、肉類、乾貨等入廚用品都好齊。
通常旅客去嘅多數係「場外市場」,呢度本來係築地市場工作嘅人去食嘢嘅地方,因為築地每日都好繁忙,所以壽司店、蕎麥麵店等可速食嘅店較多,依家都好多旅客會去,其他如洋食、中華料理都有呢!大家熟悉嘅吉野家1號店都係喺場外市場架!
其中有間已有110年歷史嘅老內舖「鳥藤」,佢地會從日本各地入新鮮雞,再加工或分成唔同部位賣俾其他分銷或餐廳等,日文「朝締め」,即係當日晨早劏嘅雞,即日發售嘅新鮮雞。
當然用佢地新鮮雞嘅燒鳥店,或餐廳有好多,多數都會寫明用「朝締め鶏」,客人就知雞肉特別鮮味Juicy,燒半生熟都得。佢地店舖都有賣炸雞、雞漢堡等唔同食品,有110年經驗嘅店,大家都食得安心。
鳥藤起初做加工,後來開埋料理小店,以鹽味親子丼同雞鍋定食最出名。近年仲開發有用100%雞肉做叉燒嘅雞拉麵。因老闆嚟過香港食過白切雞覺得超好味,自己回日本後又推出咗港式白切雞飯等,雖然同香港版本唔同,但係好有特色,都好好味啊!下次大家不妨試下。
雞飯屋 鳥藤 東京都中央區築地4-8-6
【Kei San 小檔案】 日本北海道出生。居港超過三十年,能操流利廣東話,年輕時出國留學,畢業後走訪海外多國工作的關係,練就出獨立自「煮」的好手藝,對食材的選擇也有心得,因此被傳媒發掘,活躍於各大報章雜誌的烹飪示範及美食專題,更有幸參與不少電視節目演出及主持,是料理達人及美食家,日本飲食文化的傳道者。
圖說 1) 通常親子丼都用醬油汁底,鳥藤特別地用鹽味,突出雞味。 2) 佢地水煮雞定食即用清雞湯煮新鮮雞件,好有咬口。 3) 呢個日式白切雞肉,雞肉剛剛熟,好滑身;仲有自製薑蓉。 4) 雞清湯雞肉拉麵,全部都係雞,梗有雞香啦! 5) 明治40年創店至今,即1907年呢! |
您可能有興趣:
|