咖啡嘅来源已经係无从稽考喇，其中一个说法就係咖啡原产地埃塞俄比亚西南部嘅一个高原地区，据说喺成千年前有个牧羊人发现啲羊食咗一种植物之后，就变到好鬼兴奋，之后就意外发现咗咖啡喇。无论如何，依家饮咖啡确实已经成为咗一种学问喇，乜嘢虹吸法、烘焙、萃取、猫屎咖啡……所有所有呢啲学名，真係代表住每一个唔同范畴嘅咖啡知识喇！
讲乔亚欧意咖啡，你未必识！之但係一话张智霖饮嗰款咖啡呢，肯定你即刻有记忆！男神做代言喎，唔饮得都睇得啦。饮完好似同男神拥抱咁喎，我大食小记点都要朝圣下嘅。
喺大量广告嘅宣传，再加上明星效应下，咁乔亚欧意咖啡係有佢令人着迷嘅条件嘅。口味方面……咪当饮紧奶茶啰。甜就甜咗啲，怕肥嘅姐妹就饮小啲，睇下男神个机师look就算。
大食小记
我大食小记太爱张生啦！喺唔睇憎面都睇佛面嘅大环境下，我梗係要畀高分啦！
米奇
我一定唔会畀高分啰。太太太太甜啦，完全无咖啡嘅味，得奶味。
Chris
我都唔会俾高分㗎。似奶茶多过似咖啡，一啲都品尝唔到咖啡嘅质感。
奶路臣
其实包装几靓，奶味係好重。唔啱我口味，我钟意咖啡嘅苦涩味㗎。
麦斯威尔够出奇！
麦斯威尔都出名㗎，不过呢只韩版就少见啲！喺零食店见到佢，唔突出嘅包装，但係有韩文咁特别，就买佢返嚟睇睇真章先！呢铺劲喇，会唔会就係呢只韩版黑马跑出呢？
包装同质量成咗正比，唔突出嘅包装配搭住无味嘅咖啡，真係好match！但係都有评审认为嗅觉嘅享受大于味觉……总次就发现到实有人钟意呢款咖啡嘅大道理啰。
大食小记
好香！好有咖啡香味！其他就一啲都唔特别……因为佢係无味，连咖啡经常过盛嘅甜味同奶味都无。
米奇
一打开好香嘅咖啡味涌出嚟，心谂掂啦！实正，唔畀高分都要赞多啲佢。点知饮咗之后，真係算啦。完全唔知饮紧乜，都无味嘅。
Chris
真係世界级！唔知点解可以有咁强嘅香味，但饮落去就同口感啦、醇啦、奶味啦完全无关係啰。
奶路臣
我会畀高分係因为嗰股咖啡香！我钟意饮咖啡嘅好大原因係因为香味！我着重嗅觉多过味觉，所以觉得呢款几好㗎。
大路之选雀巢咖啡
每一个早上，每一间办公室，每一所学校，点都会见到佢嘅存在。呢一款罐装咖啡皇者，就真係要睇下得唔得评审嘅欢心啦。
虽然係家喻户晓，但依然留唔住评审高傲嘅心。睇得出评审对于咖啡嘅香味大于只係着重滑嘅咖啡，所以雀巢咖啡都争取唔到高分数。
大食小记
虽然我好想畀高分啲呢一款咖啡，但係饮太多，对佢无情意结，仲觉得有啲闷。虽然日夜都会饮，但只係提神饮品。
米奇
我日日饮，都饮惯咗佢只味，唯有投下感性嘅分数。咁始终都算係滑嘅，但咖啡味都係少啲啰。
Chris
都几滑嘅，但都唔会呃到我分数啰。咖啡太多奶所以滑，但都係因为太多奶所以似用奶粉开嘅咁。
奶路臣
只不过係滑啲，但嗰股奶味我真係顶唔顺啰。香味唔係咖啡香，只不过係奶香。我拒绝俾分！
四洲咖啡屋之紫菜咖啡
四洲紫菜我就食得多啊，四洲咖啡我就真係未饮过。虽然我大食小记早有耳闻，呢只其实咖啡都好唔错，但都係要会一会先知箇中真谛，就睇下佢可唔可以得到评审所爱！
好明显四洲咖啡屋好受评审嘅欢迎啦！大家都一致认为咖啡各方面配合得恰到好处，而最重要嘅係入口嘅口感能够满足到评审嘅味蕾。
大食小记
好味，好细滑啊，其实仲有淡淡嘅咖啡香味添！加上佢够大罐，饮完又饮，好似饮唔完咁。绝对有资格高分过我男神。
Chris
其实一打开罐咖啡，香气都喷出黎㗎喇。加上咖啡味啱啱好，仲有种醇厚嘅质感，好配合我对咖啡嘅需要。
米奇
我赐予佢极高评分。因为佢有一个字：好！有奶所以滑，但唔会过甜，又有股浓郁嘅咖啡香气。
奶路臣
佢没咖啡嘅苦涩味，但又有一种厚实嘅口感，又醇又香又够饮，又可以发挥到咖啡提神嘅用处。
真係估唔到竟然係四洲咖啡屋力压一众罐装咖啡名牌，突围而出！嗱，所以真係唔好以为名牌咖啡就好味，黑马嘅实力真係不容小觑。不过呢……其实饮罐装咖啡真係好肥啰，所以我大食小记都係小饮为妙，我怕迟啲大食妈唔认得我啊。其实咖啡，好多人日常饮嘅估计都係罐装咖啡啦，当然对于有闲情逸致嘅人嚟讲，买咖啡豆返嚟煮口味就更好，但係现代人都好忙，罐装咖啡就即刻成为咗首选，所以今次嘅比併可以畀大家参考参考下。
而我大食小记，亦终于喺今次比併之中，搵到咖啡界男神以外嘅黑马王子喇！
搜寻新闻
