不過筆者剛周日頭場下注在「悅悅友福」身上,鞍上人韋達前中段憑一檔之利貼欄跑,本來開到個靚頭,轉彎入直路移出似乎想搵位望空,卻原來只係等對手散開畀位佢上,見未能摩西過紅海之時,略為移出,到差不多可以望空之際,突然又移入,結果繼續受困,到其後能夠望空,其實大勢已去,如此走位之下最終跑第五,距離季軍「心有靈犀」不足一馬位,如果直路上「悅悅友福」可以無擠無阻衝刺,就算未能取勝,亦最少會有位置,所以雖然有人瞓住等贏,卻未必個個可以做到,韋達如果真係想贏多幾場頭馬,陣上就要動動腦筋去搵位,而不要再等運到了。
金磚五國強項出擊
講番明晚谷草賽事,第四場第四班1650米,「沙角威龍」上季至今七次出戰谷草,取得1冠3亞1季1殿(見表),最差的一仗都跑第六,可見係谷草能手,其中近兩仗先後於谷草一哩及1800米跑獲亞軍,無論走外叠或沿內欄推進都追得好,確認跑法夠機動,明晚續配田泰安及排六檔起步,形勢與近兩仗差不多,機會坐位望贏。第五場第四班1200米,「金磚五國」今季演出準,尤其安排出戰谷草短途,經常前列而返,上仗嘗試縮程跑1000米姍姍來遲,今仗重返三捷強項谷草1200米,有力補中。