「紅海威」昨朝出跳時，文家良金睛火眼睇實。

【晨課逐個捉／馬房仔】連續兩個禮拜進行大賽，一班騎師亦積極起來，好似潘頓，昨朝5點半已經出現並為多匹戰馬主課，首匹出跳馬「紅海威」自然亦成為焦點。事實上，潘頓對此匹質新馬相當重視，喜見上仗交出好走勢，復課不久已過檔，昨朝一課不只用心出試，及後空檔到烽火台休息，潘頓更坐定定同文家良傾談。

講開早到騎師，不得不提杜利萊，向來「7點」不露，踏入季尾晨課更甚少蒲頭，昨朝6點15分已現身絕對矚目，他先試「超然」，跟手操了兩匹冇程馬，再替「好叻仔」考驗，上述兩駒都是鄭廐參戰馬，足見騎練滿肚密圈，再者收操之後兩人形影不離密密斟，似有傾不完的話題。

每逢賽事在周日上演，徐廐戰馬多在周三試跑，然而前朝出跳馬不多，原來有原因的，皆因多駒留待昨朝彈草閘，包括「好友益」、「財寶家駒」及「靚紫荊」，其中前兩駒既進行拍跳，甚至「財寶家駒」由莫雷拉過檔出試，動態非比等閒，上述三駒確有看好必要。