有時啲騎師順開就順，嗰排或嗰日搏殺得心應手，真係唔可以低估，就以田泰安為例，啱啱禮拜三佢騎足八場，頭場已有「飛快叻」跑到第五，之後隻隻馬入到前四名，整晚個人贏到3W，可以話由頭順到落腳趾尾，呢啲唔係旺，唔通單憑實力就得咩。

至於潘頓都攞到2W，18蚊「心慷慨」贏來淡定到不得了，尾場「勢必跑」完全係贏喺佢精湛走位，不過佢當晚都輸咗兩三匹有飛嘅馬，如「勁飛勁」、「滿貫中環」及「愛樂寶」，唔似得田泰安咁堅。雷神嗰晚搏起上嚟硬係爭啲，全晚贏得一隻「華美之寶」，復出之日未能為馬迷帶來一份大禮，有啲熱門仲跑到P都冇。不過此一時、彼一時，呢個星期日佢啲馬堅到痺，坐住有兩三場頭馬喺手。