「歡樂之光」上季曾造快時間贏馬。

【神祺小子／祺神】今期賽事採用全闊A欄，上一次季初用呢條跑道大利內叠前置，不利後追，聽聞每逢有大賽草地會整做間條紋跑道，印象中會利前置馬。點都好，臨場再執生吧！
筆者上次提過向來唔鍾意參與高班賽事，但今期有一匹馬令筆者不能忍手，當然也預計到會超賣到1點幾倍，有2倍都偷笑，如果我淨係畀單Win一定有人鬧我畀埋啲擦鞋仔貼士，所以決定研究孖寶射啲乜好，博佢升水起個孖！
頭關決定用第四場二班1800米「歡樂之光」，呢隻馬筆者決定不解釋，人人都知佢咩料，唔好嘥太多口水。孖寶下射第五場四班1400米「十分酷」，上季初出田草1400米用潘頓壓陣已被捧成大熱門，結果氣管有血引致落敗，第二場總場次763縮程跑1200米用史卓豐排十四檔，臨埸飛數又倒水咁倒，結果出閘本身快但騎師將佢留後，轉彎同人撞咗兩下之後收工，當日跑道後追是相對不利的，之後練者將馬匹安排休息重新再做。
呢兩場賽事令筆者覺得幕後有人將呢隻馬睇得好高，再翻查紀錄這位馬主養馬十多載，原來潘頓未試過為梁先生名下馬匹贏得頭馬，以往亦甚少用上潘頓，反而何澤堯就有試過幫馬主贏馬，近期試閘加配備後走得起勁，直路閘走外欄不利地都有走勢，埋門更辣操，似足方仔搏殺手法，即管睇下呢條孖寶係咪潘頓下射方仔咁簡單！