【落飛馬啟示／張平】第四場「龍鳳情祥」上仗雖然係爆冷開齋，但其實有人對此駒早已經信心十足，賽前此駒曾經一度淪為56倍大冷門，但臨入閘最後5分鐘卻見到賠率急降，最後僅得38倍開跑，冷門馬落飛幅度如此大，信心之強可見一斑，結果此駒票到馬到，在潘明輝胯下一早守於前列位置，直路上發力追上險勝短馬頭位，由於贏馬距離短，勝後只加6分，今仗留在四班仍然不用負重磅上陣，加磅影響甚為輕微，再加上此駒目前4歲進步幅度可以好大，今仗原庄配搭再戰同程，有埋一檔之利形勢造就，寶尾都要追。
第十場「勝利歡星」近三仗取得全勝佳績，其中上仗排十四檔起步形勢一般，賽前曾經淪為14倍冷門，但開跑前突然急劇落飛至7.6倍，信心並未因排大外檔而減退，結果在黃俊胯下放到險勝，今仗由於騎者停賽，此駒換上曾替馬兒三捷的潘明輝，人馬更為合拍，可憑銳氣爭取四連霸。