【风花雪月/子乐】较早前马会公布咗新一季赛期,一季八十八次不变,跑马地日赛有一次、沙田日赛四十六次;跑马地夜赛有三十六次、沙田夜马五次,至于会唔会加多啲场数,只有到时至知。乐仔唔係好记得刚季赛期係点样编排,係咪与新季一模一样,懒去搵答案,但係睇到新季有三次赛事係隔日又跑,此举唔係几好啰,就算刚季都係咁,并唔代表新季都要係咁。
战事频密难消化
基本上,一季八十八次赛事已经「质」到密密麻麻,除非係无赌不欢、够皮唔够瘾嘅一类,否则都会感到几「饱」,一星期两日尚且顶得顺,但三日跑两次,係咪多咗呀,仲要係一季之内有三次咁多,十月一日与七月一日嗰两次可以理解嘅,至于復活节赛期嗰次有没需要咁「质」落去呢?
不过讲咩都没用,依家投注额年年创新高,马会睬你都傻,整靓盘数至上,俗语有话一鸡死一鸡鸣,唔钟意嘅大可离场,反正好多人继续加入呢个赛马圈子,大把赌仔成为新血,所以,就算对马会有怨言嘅马迷朋友,唯有哑忍,一家独市没办法啦!