【风花雪月/子乐】噚日三点半马会宣布赛事取消,好似係几明智且敏捷嘅做法,但事实又係咪呢?乐仔觉得睇吓你哋係咩身份啰,如果纯粹係马迷,咁当然饮得杯落啦,完全唔使破费再买马经,又唔使再度马,一于放自己假,暂时放低斗志,可以唞吓。 但係作为马经从业员,噚日就O嘴,叫苦连天,三点几叫停,事前工夫做好晒,写好嘅稿,整好嘅版呀,全部作废,呢次真係白做,迟唔取消,早唔取消,係要等到晏昼,点解唔提早啲,等啲早出街嘅马经唔使做,无谓累人累物,费时失事。 所以有时马会都几自我风格,唔会点理会赛马媒体,但没法子啦,人哋口大,你口细,边会有say呢,唯有哑忍,投注额高企之时,边会理得咁多,又唔关佢哋事,白做係你哋之嘛。
佳运来破格赢一哩 讲番马事,上个礼拜日,石哥只「佳运来」爆出24倍冷门,呢匹马四班有着数,本来赢马唔係奇,奇就奇在喺田草1600米,过去咁多年,跑过1600米九次咁多,得两场跑到第四,好多时係十名过外,势估唔到呢铺一转仓即刻赢1600米,有时真係唔到我哋唔信,运气嘅嘢,有就有,没就没。 |