【神祺小子/祺神】馬不停蹄,今日上演十一場田草賽事,採用C+3欄,記得十幾年前,筆者初接觸賽馬,老前輩常說C+3欄利放頭,買晒內檔同放頭馬就掂,當然佢有佢道理,十年前特別快活谷,一隻馬跑C+3欄抽得內檔加上有前速就如打電腦online game的「大技」一樣,非常大殺傷力。但日子久了,偏差成日臨場先知,筆者仍醉心研究場地偏差的原因是深信呢樣嘢真係幫到自己揀馬,相信日後會有更多更多新一代研究呢個話題。 今期推介第四場四班1600米,「勇駒」上季總場次678用雷神跑同程蝕盡慢步速後上跑第二,跑第三名的「寶正寶」再出跑1800米快放再上名,今季都有一場頭馬,賽績絕對有水凖,咁「勇駒」之後發生咩事呢?725場次去谷草1650米又蝕超慢步速跑第六,之後764場次走去跑泥地,遇到不利追的濕泥跑第五,今季首戰氣管有痰,抹咗去,157場次遇上大利前置偏差,衝贏「大運起」,上仗202場次臨場有雨不利追,加上超慢步速其實當冇跑過,今次賽事退出咗兩隻馬之後得九匹馬跑,只要騎者不要留到最後,應該可以爆一段贏馬! 另外拆組第六場四班1600米,「勁好玩」今季四戰1400米,總場次077,只係輸畀再出再贏的「數糊勇士」。筆者留意到「勁好玩」是一匹貼欄領放特強的馬匹,你可能會問,上次都係貼欄啦,但上次內欄全日較差,同埋今次上1600米放頭段速上應該比1400米較為輕鬆,一檔啱晒發揮! |
您可能有興趣:
|